Lamberti

Víngerðin Lamberti heitir eftir einni af elstu aðalsættum Veróna og Torre dei Lamberti, hinn víðfrægi turn sem stendur við aðaltorgið Piazza delle Erbe, heitir eftir sömu fjölskyldu. Víngerðin hóf starfsemi árið 1964 og lét þá nægja að framleiða Bardolino Classico vín, en í dag er Lamberti í hópi leiðandi víngerða á svæðinu og er þekkt um allan heim.

Vínekrur Lamberti standa við Garda-vatnið og jarðvegurinn þar er ríkur af steinefnum sem skriðjökull skildi eftir endur fyrir löngu er hann hopaði af svæðinu. Öll þessi áhrif skila sér alla leið í glasið og það má skynja einkenni ræktunarsvæðisins í nefi sem og munni þegar kemur að því að njóta víns frá Lamberti.

Ræktun vínviðar við Garda-vatn hefur verið órjúfanlegur hluti mannlífsins á svæðinu síðan á tímum Rómverja. Hið óviðjafnanlega samspil milds loftslags og steinefnaríks jarðvegs gefur af sér einstakar þrúgur og framúrskarandi góð vín.

Segja má að hjarta Lamberti sé aftur á móti hinn ævagamli sveitabær sem á landareigninni er. Fyrstu heimildir um húsið er að finna á korti af svæðinu frá miðri 15.öld. Í dag nefnist húsið Casa della Lamberti og þar er bæði hægt að bóka vínsmökkun og eins hægt að kaupa vín.

Allar vínekrur Lamberti eru ræktaðar með gamla laginu, ef svo má segja. Fornar vinnsluaðferðir sem bera algera virðingu fyrir náttúrunni og taka mið af aðstæðum hvað varðar loftslag og jarðveg, ásamt því að sneiða alfarið hjá notkun kemísks skordýraeiturs eru meðal helstu ástæða þess hve góð og eftirsótt Lamberti vínin eru í dag.