The Famous Grouse

Sú lífssýn hefur ávallt verið allsráðandi hjá framleiðendum The Famous Grouse að frægð ein og sér sé ekki merkilegt markmið; meira sé um vert að gera hlutina rétt og af heilindum, og þá muni frægðin hægt og rólega fylgja í kjölfarið. Þetta var það sem stofnandinn, Matthew Golag, innrætti öllu sínu starfsfólki um leið og hann gerði sér far um að koma vel fram við alla sem hann hitti.

Allt hans starfsfólk endurspeglaði óbilandi dug hans og metnað og úr varð blandað viskí í hæsta gæðaflokki sem kallað var einfaldlega Grouse og kom á markað árið 1896. Þess má annars geta að grouse er hænsnfugl af orraætt, ekki ósvipaður rjúpu. Allt um það, viskíið óx að vinsældum og loks kom að því að ekki varð lengur umflúið að endurskíra viskíið, því svo mjög hafði hróður þess borist víða. Úr varð The Famous Grouse, nema hvað.

Enn þann dag í dag eru lífsmottó Matthew Gloag í heiðri höfð í starfsemi The Famous Grouse, og til að minna á það fyrir hvað stofnandinn stóð er undirskrift með hans eigin rithönd prentuð á hverja einustu flösku. Það er ekkert smáræði því á hverju ári eru seldar 43 milljón flöskur á alls 94 mismunandi markaðssvæðum um allan heim. Heimili og framleiðslustaður The Famous Grouse er Glenturret eimingarhúsið í Crieff, elsta starfandi viskígerðin í Skotlandi.